Seanca e së enjtjes, më 24.04.2025, ndaj Shkumbin Kryeziut, i akuzuar për vrasjen në Hajvali më 2021 – rast ky i kthyer në Rigjykim – nuk ka arritur të mbahet, kjo për arsye të një gabimi të Njësisë për Bartjen e Të Burgosurve.
I akuzuari Kryeziu akuzohet se së bashku me një të mitur pas disa mosmarrëveshjeve të mëhershme që kishin pasur me tashmë të ndjerin V.Xh., me qëllim që ta privojnë nga jeta e godasin me thika dhe si pasojë e plagëve V.Xh. kishte vdekur.
Me të filluar seanca kryetari i Trupit Gjykues Ertan Sejfulla njoftoi se Njësia për Bartjen e Të Burgosurve (transporti) kanë gabuar orën e sjelljes së të burgosurit Shkumbin Kryeziut.
Tutje, gjyqtari Sejfulla bëri të ditur se të njëjtit i kishin thënë se për 40 minuta mund ta sjellin të burgosurin në Gjykatë, mirëpo për shkak se ishte orari i pauzës dhe se në sesionin e pasdites ai ka një gjykim tjetër të planifikuar, Gjyqtari njoftoi se seanca nuk mund të mbahet.
Në mungesë të kushteve ligjore seanca e sotme, më 24.04.2025, nuk u mbajt. E radhës është e caktuar për në muajin maj 2025.
Gjykata Themelore e Prishtinës, më 25 korrik 2024, e kishte dënuar të akuzuarin Shkumbin Kryeziu me 20 vjet burgim. Ky rast është kthyer në Rigjykim nga Gjykata e Apelit, në seancën e Kolegjit të mbajtur më 05.12.2024.
Lidhur me këtë çështje penale prokurori i rastit Arben Hoti në fjalën përfundimtare në shqyrtimin e parë gjyqësor kishte bërë ricilësimin e veprës penale nga “vrasje e rëndë” në “vrasje në bashkëkryerje”.
Prokuroria këtë ricilësim e kishte bërë duke u bazuar në Aktgjykimin e Gjykatës Supreme, sipas të cilit Gjykata, duke vepruar sipas Kërkesës për mbrojtje të ligjshmërisë të të miturit (i ngarkuar në procedurën për të mitur si bashkëkryerës i kësaj vepre penale), kishte aprovuar Kërkesën dhe kishte ndryshuar Aktgjykimin e Gjykatës së Apelit dhe Gjykatës Themelore, me të cilat i mituri si bashkëkryerës ishte gjykuar fillimisht për veprën penale “vrasje e rëndë në bashkëkryerje”, mirëpo sipas Aktgjykimit të Gjykatës Supreme ishte bërë ricilësimi i kësaj vepre penale në “vrasje”.
Në bazë të kësaj Prokuroria kishte konsideruar se, meqë ka të bëjë me të njëjtën vepër penale të kryer në bashkëkryerje, ricilësimi i veprës penale ka karakter detyrues edhe për të pandehurin Shkumbin Kryeziu.
Ndaj të miturit është zhvilluar një procedurë tjetër dhe është dënuar.
Çfarë thotë Aktakuza?
Sipas Aktakuzës së ngritur më 29.12.2022, më 10.12.2021 rreth orës 21:15 në fshatin Hajvali, pasi që ka zbritur nga autobusi i ndjeri V.Xh., bashkë me dëshmitarin Kujtim Pacolli, rrugës për të shkuar në shtëpi i kishin rënë rrugës më të shkurtër, ishte takuar me të miturin në oborrin e Shkollës, ku ishin edhe dëshmitarët Gojart Sejdiu dhe Mirsad Haxholli, të cilët ishin konfliktuar me fjalë. Në atë moment i mituri e kishte nxjerrë thikën dhe në ato momente kishte arritur i pandehuri Shkumbin Kryeziu, i cili me thikë në dorë së bashku më të miturin e kishin ndjekur të ndjerin.
Sipas Aktakuzës me të ndjerin duke ikur ishte edhe dëshmitari Kujtim Pacolli, ku dëshmitari ishte rrëzuar, ndërsa i pandehuri bashkë me të miturin kanë vazhduar ta ndjekin tashmë të ndjerin dhe të dy me dy thika në dorë nga hakmarrja e paskrupullt, për shkak të disa mosmarrëveshjeve më herët që kanë pasur, e godasin me thika në trup V.Xh., i cili për shkak të plagëve të marra në trup ka vdekur në QKUK.
Me këtë i pandehuri Shkumbin Kryeziu dhe i mituri kanë kryer veprën penale “vrasje e rëndë”.
Sipas Dosjes së Prokurorisë, i pandehuri Shkumbin Kryeziu akuzohet edhe për “armëmbajtje pa leje”.
