Gjykata e Prishtinës më 07.05.2025 ka aprovuar Kërkesën e Prokurorisë Speciale duke ia caktuar masën e paraburgimit ndaj të dyshuarit H.S., për veprën penale të spiunazhit.
“Pas mbajtjes së seancës dëgjimore, Gjykata vlerësoi se caktimi i masës së paraburgimit në këtë çështje penale është masë adekuate, sepse nëse i pandehuri lihet në liri, ekziston rreziku i ikjes, duke pasur parasysh rrethanat dhe mënyrën se si është kryer vepra penale; mund lehtë të arratiset për t’i ikur përgjegjësisë penale. Gjykata vlerësoi po ashtu se nëse i pandehuri lihet në liri, e njëjta mund të ndikojë në prova dhe në dëshmitarë, si dhe mund të përsërisë veprën e njëjtë penale, ose mund të kryejë sërish vepra të tjera penale në rrethana të njëjta, ose më të rënda.” – thuhet në Njoftimin e Gjykatës së Prishtinës.
Gjykata ka vlerësuar po ashtu se nëse i pandehuri lihet në liri, i njëjti mund të ndikojë në prova dhe në dëshmitarë, si dhe mund të përsërisë veprën e njëjtë penale, ose mund të kryejë sërish vepra të tjera penale në rrethana të njëjta, ose më të rënda.
Tutje në Njoftim thuhet se Gjykata ka konsideruar se pesha e veprës penale është e natyrës së rëndë, andaj caktimi i masës së paraburgimit është masë e domosdoshme në këtë rast penal dhe se çdo masë tjetër do të ishte e pamjaftueshme për zbatimin e suksesshëm të procedurës penale, pengimin e rrjedhës normale të kësaj procedure penale, si dhe pengimin e përsëritjes së veprave penale.
Kundër këtij Aktvendimi, palët e pakënaqura kanë të drejtë Ankese në Gjykatën e Apelit, përmes Gjykatës Themelore në Prishtinë.
Prokuroria Speciale më 06.05.2025 ka njoftuar se ka arrestuar personin H.S., i cili dyshohet se ka kryer veprën penale “spiunazhi”.
Sipas Njoftimit të Prokurorisë, arrestimi i të dyshuarit ka ndodhur pas zhvillimit të hetimeve disamujore dhe aplikimit të masave të veçanta hetimore.
Ndaj të dyshuarit Prokurori i Shtetit ka nxjerrë Aktvendim për ndalim prej 48-orësh.
Aksioni dhe arrestimi është zhvilluar në bashkëpunim me Policinë e Kosovës, Drejtorinë për Hetimin e Krimit të Organizuar dhe Krimeve të Rënda, si dhe asistencën e Agjencisë së Kosovës për Inteligjencë.
“Po ashtu, në bazë të Urdhëresës së Gjykatës kompetente është kryer edhe bastisje në dy lokacione në Kosovë, ku janë sekuestruar prova materiale, përfshirë edhe disa telefona, që dyshohet se janë përdorur nga i dyshuari gjatë kryerjes së veprës penale.” – thuhet në Njoftimin e Prokurorisë Speciale, më 06.05.2025.
Prokuroria Speciale shton se ndaj të dyshuarit do të ndërmerren të gjitha veprimet e nevojshme hetimore për zhvillimin e suksesshëm të procedurës penale.
